اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر

اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر أستاذه سناء جعفر

تعال يا الجيت مدفور بفضولك ..
وما تستغرب كلامي الجاي ..
اصلاً انا قاعدة في بيت غريب وعجيب ...
فيهو الشئ وضد الشئ ...
خت اضانك واسمعني ...

اعتراف رقم (1)

انا شيوعية ضلامية ...
وحبيبي كوز مستنير ...
في الصباح بنحفظ قرآن ...
وبالليل بنقرا لينين ...
أبوي بيموت في الاتحادي ...
واخوي عمو البشير ...
اختي حزب امة ...
وأمي صوفية جد ...
جارنا جمال المسيحي ...
واخته رجاء أسلمت ...
لوال صديقي الجنوبي ..
وميري خطيبة محمد ...

وحوشنا لسة ملان ...
[b]

اعتراف رقم (2)

جيراننا ومعانا في نفس الحوش ...

أدروب ود بت حسونة ..
بيشتكي انو مهمش ...
ومجذوب ود سيد البلد... عامل منو مطنش ..
هارون بيحب المشاكل ...
واسحق زولاً مسالم ...
وجمعة الولد المشاتر .. حالف يكاوي العساكر ...

مشاعر بت جد لذيذة ... بس بتحب المظاهر ...
ومناهل ديك الرقيقة ...زمانا كلو تعافر ...
شايلة هم الحبايب ...وحايمة تجبر الخواطر ...
أميرة بتاعت المشاكل ...
تحب تباري الجداد ..وتنبش كوش الدفاتر ...
تكورك ... تضارب .. تناهد ...
بس عشان تثبت وجودها ...
وفي غمرة صراخها .. بتنسى وجودها ...
بتنهي وجودها ...

والحوش لسة ملان .... بالحبان والجيران

شاعرنا السر عثمان الطيب... قال
وطن واحد .. وطن واعد

وطن واعـــد .. بغنِّيلو

موحَّد .. والمصير واحد..بغنِّيلو

وطن من كسلا للفاشــر ** وطن من نمولـي لي حلفا

وطن بالوحدة يتعافــى ** ربوعــــــــــو تعمهــا الإلفــة

يقيف ناهض على حيلـو

شمالو البي الجنـوب قـوَّة ** جنوبـو مع الشمال خُوَّة

غربـو ال للشــــرق يهوى **وشرقو مع الغـرب يقوى

سلام .. .. والناس تناديلو

وطن ما فيهو قبليـــــة ** ولا نزعــــــــــــة إنفصاليــة

وطن زنجيتو عربيـــــة ** وعروبتو السمــــــرا زنجيــة

سوا سوا .. كلُّو حريـة

سوا سوا يا بجــة ونوبة ** سوا سوا .. فور وشايقيـة

مسيرية وشلك ، دينكــا ** سوا سوا زانـــدي ، لاتوكا

وطن حق كل زول .. هولو

سوا سوا صحرا والغابة ** سوا سوا وحـــــدة نرضابا

سوا سوا نخلة وابنوســة**روا روا فوق ضفــاف نيلو

وطن واحد .. ولا غـيرو ** جميــع نتهنى بـي خيــرو

نغــني مع عصافيـــرو ** وننقـــرش فـي طنــابــيـرو

نصفق له ونراقصو نشيل شبابيلو

اعتراف رقم (3)...

وما زلنا في الحوش ... ووسط الجيران ....

عمي حسين وهابي اصيل ...
وولده الزين بتاع ربة عديل ...
بته الروضةبتحب المقيل ..
في قبة شيخها ود عقيل ...

.

اعتراف رقم (4) ...

خالي العبيد.. سلفي شديد ..
جنو فتاوي صعبة وغريبة ..
يجي صباح يكفر زول ...
وتاني صباح يزندق زول ...
لكن ..
مرة سمعته ...
بيدندن سراً ...
اغاني الحقيبة ...

اخوهو المكمل مشاكس عنيد ...
غرامو الوحيد ...
يقعد في علاهو ... ويقسم البشر ...
دة كوم اسياد ... ودة كوم عبيد ...

واقعدوا لسة ... النوصف ليكم باقي ناس بيتنا ...

اعتراف رقم (5) ...

جدي قال امنجي ..
ما بيعرف غير يمشي ويجي ...
في دروب الانكسار ...
مهمته المقدسة ..
يكتب للجماعة تفاصيل مفصلة .. مدنكلة .. مدبجة ...
عن احوال الكبار .. والعاب الشفع الصغار ...
الليلة اصبح جدي محتار ...
ما لاقي كلام يتقال في التقرير البيولد الدولار ...
فكر ... فكر ... فكر ...وفي النهاية اختار ...
جدي كتب تقرير عن حبوبتي ام الجهال ...
قال انها زولة ممغوسة وشايلة للحكومة التار ...
وانها بتحرش الثوار ...بتولد الاخيار وتقتل الاشرار ...
وانها اخطر عميل عرفته الامصار ...
اوصى بسجنها وضربها بالنار ...

كانت ضربة معلم بسيف بتار ...
ربج جدي وقبض الدولار ...
خلص من حبوبة ست التار ...
وعرس ميمونة العمرها فوق العشرة بسبعة قصار ...

ولسة مشاكل الحوش ما خلصت ...
بس انا نعست وباحكي ليكم الباقي بكرة ...

اعتراف رقم (6) ...

حبيبي بيكره اخوي ...
اختي خاصمت ابوي ...
امي بتنق في رجاء ...
ومحمد بينافق لوال ...
ميري لبست حجاب ...
مشت بيهو الكنيسة .. بس عشان ترضي محمد ...
ادروب مصاحب هارون ...
جمعة مقاشر مجذوب ...
نفيسة عرست جورج ...
وانا قلت الروووووووووب ... اعتراف رقم (7) ...

حبيبي شاكل اخوي ...
ضربه بلسانه وشتت كرامته شتات ...
اخوي لم ناسو .. وشال ليهو سيخة ...
وداك لم كوموا ... وضبحوا الكديسة ...

وكبـــرت المشاكــــل...
طــالت العــروض ...
وكــسرت العهـــود ...
بحرمة الكلام ... في اسرار البيوت ...

قل الانسجام ...
ضاع الاحترام ...
وقعت الحيطان ...
وبقينا فرجة للعيان ...
بقينا فرجة بالمجان ...

في السما الحيران ...
اتجمعت عقبان ...
منتظرة لحظة ضعف ...
لحظة سقوط انسان ...
شان تبدأ تنهش لحمو ...

احي يا حوشنا ...
ناسك فقر بالحيل ...
فعالهم تهد الحيل...
وتشمت العزال ...

احي يا حوشنا ...
ناسك نسوا الخوة ...
وطلعوا لجوة ...
حاربوا الحشمة ...
وهتكوا عرض الستر ..

احي يا حوشنا ...
ناسك بيعملوا طمام ...

ولسة الحوش مليان ... بس خلوني امص ليمونة تودر الطمام من بعض اخواني ... وبعض اعمامي .. وبعض خيلاني ... وبعض اصحابي ...

بجيكم راجعة ... استنوني ...

وصلنا وين ؟؟؟
احنا لسة جوة الحوش ...

الود عارف اخو عمي التوم ... قاعد عاطل ...
حايم من فجة لفجة ...
وفي كل مكان بيخت عنوان ..
( داتا) جديدة ولقب رنان ...
هنا فاهم ...
هناك إنسان ..
وفي مكان تاني سيد الوجعة وحامي الحميان ...
يكب بيجاي حبة نقة ...
ويمشي هناك يخت السم مدسوس ومغتى ...
عامل فيها ابن الفارض ...
وين ما يكون قاعد ينظّر...
فلان ما بفهم !!!
فلانة حمارة !!!
داك غبي !! ... وديك غبيانة !!!
وهو المعجم ... هو العلامة ود حاج مبروك بيحب اللمة ...
عندو غرام مع حاجتين ...
قولة كفارة .. وقولة مبروك ...
مجامل حيل ما بفوت شئ ...
في أي مناسبة بيقعد وش ...
كان اول زول ..
لمن :
حليمة طهّرت نملتها...
خديجة كسرت غويشتها ...
ميمونة شاكلت ضرتها ...
الزينة حلبت بقرتها ...
لولا صدمت عربيتها ...
حنينة خاصمت صاحبتها...
بخيتة عاست كسرتها ...
وسوسو حرقت بصلتها ...
وكان اول زول
لمن :
ود الامين رقوهو ...
وعم جد حاج صلاح حجبوهو ...
وخال الطاهر حفيد محجوب جار حبوبة الجيران مرتو ولدت وجابت تيمان ...
ولمن علي الهملان فتح دكان ...
وصاحبو بخيت السجمان سافر برة وهجر السودان ...

طب ياخ مالو ؟؟!! ود حاج مبروك بيحب يجامل ..
بيحب قولة كفارة ومبروك ...

المشكلة شنو ؟؟؟
المشكلة ...
لمن تكون في مشكلة محتاجة وقفة ودقة صدر ...
صاحبنا دة بيختفي ... بدون اثر ...

الاعتراف ما قبل الاخير ...

اخوي وديدي منفوخ شديد ...
وملان محن ..
لونه طيف ...
مرة اخدر ... مرة احمر ...
مرة اصفر ... ومرة ازرق ...
مرة بينقط عسل ...ومرة حنضل وشوال بصل ...
مرة افهم من فهيم ...
ومرة ابلد من بليد ...
مرة حاتم ... ومرة جاحظ ...
ومرة بيعمل ما ملاحظ ...

خوفي ليهو من الابر ... ومن الدبابيس والمرايات المكسرة ...
وحتى من شوك السدر ...
طعنة واحدة ... ويبقى مافي ...

آخر كلام ....

الود محبوب ...
قاعد في السوق وقابض الجو ...
فاتح بوتيك .. وبضاعته كلام ...
اسعاره مهاودة ... وممكن تقسيط ...
بيبيع بمزاج ... وحسب الاشكال ...

جاتو فلانة الناعمة ؟؟!! ...
يقوم يديها بضاعة نضيفة ...
ملفوفة بورق سوليفان ..
مربوطة بشريطة ستان ...

ولو جات علانة الجادة ؟؟؟!! ...
دي بضاعتها غير ..
بدون تزويق .. بدون تربيط ...
كلام ثابت ومدعوم باسانيد ...

طيب ولو جات فلانة ؟؟؟
فلانة فلانة ؟؟!! ...
دي بضاعتها من الخاص .. وتمشي ليها الخاص ..
ويبدا الود محبوب يكب مكنات ...
ويكسر تلج ... يسقي بلاد ...

ولسة خليكم مع الولد محبوب ... ما دة آخر العنقود

آخر .. آخر الكلام ...

الود محبوب تلفونه ملان ...
ارقام من كينيا وباكستان ...
من استراليا والسودان ...
الود محبوب مايسترو فنان ...
عمرو ما بيغلط في عنوان ...
واصلا ما بيخلط بين جوقة الفرقة ..
يحمد ربو .. ما عندو عمى الوان ...
واضانه سليمة بتقدر تفرز صوت الدربكة .. من الكمان ...
الود محبوب ؟؟!!
جد فنان ....

رهف جديد مساهماتي : 9 تاريخ التسجيل : 23/07/2008

الرجاء الخروج من دائرة السياسة ’’’’’’’’’’’’’’’ا
وشكراً

عزرا اخي الكريم هذه لست سياسه
انها تمازج ثقافات ومورثات من كل جهات السودان
وانا اري الاستاذه سناء قادره علي خلق هذا التمازج الجميل بين كل القبائل والعادات السودانيه في وجهه نظر تخصها ونحن نحترم وجهه نظرها

ولكل يري بمنظور اخر
فانت رايت انه يتعلق بالسياسه فهذا شأنك